မော်လမြိုင်တွင် အမျိုးသားချင်း အလိုမတူ လိင်တူ အဓမ္မပြုကျင့်ဟု ဆိုကာ အမှုဖွင့်

တိုင်ကြားသူနှင့် အတိုင်ခံရသူကို ဆေးစစ်ရန် မော်လမြိုင်ဆေးရုံကြီးသို့ သက်ဆိုင်ရာက ခေါ်ဆောင်လာသည့် မြင်ကွင်း။ (ဓာတ်ပုံ - ခေတ်မင်း)

မော်လမြိုင် ဇန်နဝါရီ

မော်လမြိုင်မြို့ ကွင်းရပ် ကျောက်မီးသွေးရုံလမ်းရှိ အမျိုးသား ဆံသဆိုင်တစ်ခုတွင် ဆိုင်ရှင်က ဆိုင်လုပ်သားကို လိင်တူချင်း အလိုမတူဘဲ အဓမ္မပြုကျင့်သည်ဟု ဆိုကာ ဆိုင်လုပ်သားက မုပွန်နယ်မြေရဲစခန်းသို့ ဇန်နဝါရီ ၇ ရက်တွင် အမှုဖွင့်တိုင်ကြားခဲ့ကြောင်း သိရသည်။

“အွန်လိုင်းပေါ်ကနေ သိပြီးတော့ အလုပ်လုပ်ဖို့ရောက်လာတယ်။ ဆိုင်ပိုင်ရှင် ပိုင်ပိုင်က အလိုမတူ ဓမ္မတာမဟုတ်ဘဲ တစ်ကြိမ်၊ အဓမ္မပြုကျင့်ခဲ့ပြီး ၆ ရက်အကြာမှာ နောက်ထပ် တစ်ကြိမ် ထပ်မံ အဓမ္မပြုကျင့်ခံခဲ့ရတယ်” ဟု တိုင်ကြားသူ အမျိုးသားက ပြောသည်။

ဖြစ်စဉ်မှာ ကိုသက်အောင် ( အမည်လွှဲ၊ ၃၀ နှစ်၊ ဧရာဝတီတိုင်းဒေသကြီး ဇလွန်မြို့နယ်နေ ) ဆိုသူမှာ ၎င်းဆိုင်ရှင် အောင်ဖြိုးပိုင် (ခ) ပိုင်ပိုင် (ခ) ဥက္ကာငြိမ်းချမ်း (၃၂ နှစ်)ဆိုသူနှင့် အွန်လိုင်းမှတဆင့် အဆက်အသွယ်ရရှိခဲ့သဖြင့် အလုပ်လုပ်ကိုင်ရန် ၂၀၁၈ ဒီဇင်ဘာလအတွင်းက ရောက်ရှိလာခဲ့ကြောင်း၊ လာရောက် အလုပ်လုပ်ကိုင်ခဲ့ကြောင်း၊ ယင်းနောက် အဆိုပါဖြစ်စဉ် ဖြစ်ပွားခဲ့ကြောင်း ရဲမှတ်တမ်းအရ သိရသည်။

“အောက်ထပ်မှာ ဆံပင်ညှပ်ခုံ ၃ ခုံနဲ့ ခေါင်းလျှော်စင် ၃ ခု၊ အလယ်ထပ်မှာက အမျိုးသား မာဆပ် အနှိပ်ခန်းနဲ့ အပေါ်ထပ်မှ ဆီလူးအကြောဖြေတဲ့ မာဆပ်ရှိတယ်”ဟု တိုင်ကြားသူက ပြောသည်။

ဖြစ်စဉ်ကို ဇန်နဝါရီ ၇ ရက်နေ့တွင် မုပွန်နယ်မြေရဲတပ်ဖွဲ့စခန်းသို့ လာရောက်အမှုဖွင့် တိုင်ကြားခဲ့သဖြင့် ပြစ်မှုကျူးလွန်ခဲ့သည်ဟု ဆိုသူ ဆိုင်ရှင်ကို ဖမ်းဆီးခဲ့ကြောင်း၊ ၎င်းကို တိုင်ကြားသူနှင့်အတူ မော်လမြိုင်ဆေးရုံကြီးသို့ ပို့ဆောင် ဆေးစစ်ခဲ့ကြောင်း နယ်မြေရဲစခန်းမှူး ဒုရဲမှူး သန့်ဇင်က မီဒီယာများကို ပြောသည်။

ထိုသို့ တိုင်ကြားလာမှုနှင့်ပတ်သက်၍ ဆိုင်ပိုင်ရှင် အောင်ဖြိုးပိုင်ကို မုပွန်နယ်မြေရဲတပ်ဖွဲ့စခန်းမှ (ပ) ၁၇/ ၂၀၁၉၊ ရာဇသတ်ကြီးဥပဒေပုဒ်မ ၃၇၇/ ၃၂၃ အရ ဖမ်းဆီး၍ စစ်ဆေးဆောင်ရွက်လျက်ရှိကြောင်း ဒုရဲမှူး သန့်ဇင်ထံမှ သိရသည်။

ခေတ်မင်း

Leave a Reply